பெண் குழந்தைக்கு தந்தையான ரெடின் கிங்ஸ்லி... - ரசிகர்கள் வாழ்த்து

காமெடி நடிகர் ரெடின் கிங்ஸ்லி - சின்னத்திரை நடிகை சங்கீதாவிற்கு பெண் குழந்தை பிறந்துள்ளது. 

நெல்சன் இயக்கத்தில் வெளியான 'கோலமாவு கோகிலா' படத்தின் மூலம் நடிகராக அறிமுகமானவர் ரெடின் கிங்ஸ்லி. இந்த படம் இவருக்கு தமிழ் சினிமாவில் மிகப்பெரிய திருப்புமுனையை ஏற்படுத்தி கொடுத்தது. இந்த படத்தில் தனது நகைச்சுவையினால் அனைவரையும் கவர்ந்தார். இப்படத்திற்கு பின்னர் நகைச்சுவை நடிகராக தொடர்ந்து நடித்து வந்தார் ரெடின் கிங்ஸ்லி.

நடிகர் சிவகார்த்திகேயனின் 'டாக்டர்”, விஜயுடன் 'பீஸ்ட்' மற்றும் ரஜினியுடன் ’ஜெயிலர்' படத்தில் நடித்து ரசிகர்களை கவர்ந்தார். இந்த நிலையில் கடந்த 2023-ம் ஆண்டு சின்னத்திரை நடிகையான சங்கீதாவை காதலித்து திருமணம் செய்து கொண்டார். அதனை தொடர்ந்து இத்தம்பதி சமூக வலைத்தளங்களில் அவ்வப்போது புகைப்படங்களை வெளியிட்டு வந்தனர். கடந்த சில தினங்களுக்கு முன்பு மனைவி சங்கீதாவுக்கு பிரமாண்டமாக வளைகாப்பு நிகழ்ச்சியை ரெடின் கிங்ஸ்லி நடத்தி இருந்தார். பிரபலங்கள், சின்னத்திரை பிரபலங்கள் என பலரும் கலந்து கொண்டு தம்பதியை வாழ்த்தி இருந்தனர்.

இந்த நிலையில், ரெடின் கிங்ஸ்லி- சங்கீதா தம்பதிக்கு பெண் குழந்தை பிறந்துள்ளது. ரெடின் கிங்ஸ்லி தனது மகளை கையில் தூக்கி வைத்துக் கொண்டிருக்கும் அழகிய புகைப்படத்தை பகிர்ந்து இந்த தகவலை சங்கீதா தெரிவித்துள்ளார். இந்த தம்பதிக்கு ரசிகர்கள் வாழ்த்து தெரிவித்து வருகின்றனர்.