விக்ரமாதித்யா- பிரேரனாவின் மகத்தான காதல் கதை… ராதே ஷ்யாம் திரைப்படத்தின் பிரம்மாண்ட மோஷன் போஸ்டர்!
பாஹுபலி ஸ்டார் பிரபாஸ் இன்று தனது பிறந்தநாளைக் கொண்டாடுவதை அடுத்து ராதே ஷ்யாம் படக்குழு ஸ்பெஷல் மோஷன் போஸ்டர் ஒன்றை வெளியிட்டு சிறப்பித்துள்ளனர்.
ராதே ஷ்யாம் படம் குறித்து அறிவிக்கப்பட்ட நாள் முதலே இந்திய அளவில் அந்தப் படத்திற்கு மிகுந்த எதிர்பார்ப்பு நிலவி வருகிறது. இப்படத்தில் பிரபாஸுக்கு ஜோடியாக பூஜா ஹெக்டே நடிக்கிறார்.
முன்னதாக, இம்மாதத் தொடக்கத்தில் பூஜா, பிரபாஸ் கதாபாத்திரங்கள் அறிமுகப்படுத்தப்பட்டன. படத்தில் பிரபாஸின் ஸ்டைலிஷ் ஆன தோற்றம் ரசிகர்களை சுண்டி இழுத்து படத்தின் மீதான எதிர்பார்ப்பை அதிகரித்துள்ளது.
ஏற்கெனவே ரசிகர்கள் எதிர்பார்ப்பைத் தூண்டியிருந்த நிலையில், இன்று பிரபாஸின் பிறந்தநாள் என்பதால் அதை மேலும் இனிமையானதாக்கும் வகையில் படத்தின் மோஷன் வீடியோவை படக்குழு வெளியிட்டுள்ளது.
அழகியல் ததும்பும் அடர்ந்த வனத்தின் ஊடே செல்லும் ரயில் பாதையில் சீறிப் பாயும் ரயிலை காட்சிப்படுத்தி அந்த மோஷன் வீடியோ தொடங்குகிறது. அப்படியே விரியும் காட்சிகள் அந்த ரயிலின் வெவ்வேறு பெட்டியில் பயணிக்கும் விக்ரமாதித்யா, பிரேரனாவின் மீது படர்கிறது. இருவரும் வெவ்வேறு கலாச்சாரத்தைச் சார்ந்தவர்கள். வெவ்வேறு காலகட்டத்தைச் சேர்ந்தவர்கள். விகர்மாதித்யா, பிரேரனாவின் அறிமுகக் காட்சி ரசிகர்களின் எதிர்பார்ப்பைக் கூட்டும் வகையில் படமாக்கப்பட்டுள்ளது.
மோஷன் போஸ்டரில் ரோமியோ- ஜூலியட், சலீம்-அனார்கலி, தேவதாஸ்- பார்வதி ஆகியோர் கதாபாத்திரங்கள் இடம்பெற்றுள்ளன. இவர்களை அடுத்து விக்ரமாதித்யா- பிரேரனா இந்த வரிசையில் இருக்கின்றனர். மொத்தத்தில், ராதே ஷ்யாம், ஐரோப்பாவில் நடைபெறும் ஒரு மகத்தான காதல் காவியமாக சித்தரிக்கப்பட்டுள்ளது.
படத்தில், சச்சின் கேடேகர், பாக்யஸ்ரீ, பிரியதர்ஷி, முரளி ஷர்மா, சாஷா சேத்ரி, குனால் ராய் ஆகியோர் நடித்துள்ளனர்.
இந்தி, தெலுங்கு, தமிழ், மலையாளம், கன்னட மொழிகளில் படம் வெளியிடப்படுகிறது. படத்தை ராதா கிருஷ்ண குமார் இயக்குகிறார். வம்சி மற்றும் பிரமோத் யுவி கிரியேஷன்ஸ் பேனரில் தயாரிக்கின்றனர். ஜஸ்டின் பிரபாகரன் இசையமைக்கிறார்.
