படப்பிடிப்பின் போது பாலிவுட் நடிகர் ஹிருத்திக் ரோஷன் காயம்
‘வார் 2' படத்தின் பாடல் காட்சி ஒத்திகையின் போது பாலிவுட் நடிகர் ஹிருத்திக் ரோஷன் காயமடைந்ததாக தகவல் வெளியாகி உள்ளது.
பிரபல இந்தி நடிகர் ஹிருத்திக் ரோஷன். இவர் இப்போது ‘வார் 2' என்ற படத்தில் நடித்து வருகிறார். இதில் இன்னொரு ஹீரோவாக ஜூனியர் என்.டி.ஆர் நடிக்கிறார். கியாரா அத்வானி உட்பட பலர் நடிக்கின்றனர். அயன் முகர்ஜி இயக்கும் இந்தப் படம் யாஷ் ராஜ் பிலிம்ஸின் ஸ்பை யுனிவர்ஸ் தொடர்ச்சியாக உருவாகிறது. இந்தப் படத்துக்கான நடனக்காட்சியை மும்பையில் படமாக்க இருந்தனர்.
ஹிருத்திக் ரோஷனும் ஜூனியர் என்.டி.ஆரும் இதில் பங்கேற்கத் திட்டமிடப்பட்டது. இதற்கான ஒத்திகையில் ஈடுபட்டுக் கொண்டிருந்தபோது ஹிருத்திக் எதிர்பாராதவிதமாக கீழே விழுந்தார். இதில் அவர் காலில் பலத்த காயம் ஏற்பட்டது. பரிசோதித்த மருத்துவர்கள் 4 வாரம் ஓய்வெடுக்க அறிவுறுத்தியுள்ளனர். இதனால் படப்பிடிப்பு தள்ளி வைக்கப்பட்டுள்ளது. இந்தப் படம் ஆகஸ்ட் 14-ம் தேதி வெளியாக இருப்பதாக அறிவிக்கப்பட்டுள்ளது.
