ஒரே நாளில் சாதனை செய்த ‘ஜவான்’.. ஷாருக்கானின் படத்திற்கு எகிறும் எதிர்பார்ப்பு !

 ஷாருக்கானின் ‘ஜவான்’ திரைப்படத்தின் முன்னோட்டம் வெளியாகி புதிய சாதனை ஒன்றை படைத்துள்ளது. 

‘பிகில்’ படத்திற்கு பிறகு இயக்குனர் அட்லி பாலிவுட்டில் இயக்கியுள்ள திரைப்படம் ‘ஜவான்’. ஷாருக்கானின் மிரட்டலான நடிப்பில் உருவாகியுள்ள இந்த படத்தை ரெட் சில்லிஸ் எண்டர்டெயின்மெண்ட் நிறுவனம் சார்பில் ஷாருக்கானின் மனைவி கௌரி கான் தயாரித்து வருகிறார். சுமார் 250 கோடியில் உருவாகியுள்ள இந்த படம் இந்தி, தமிழ், தெலுங்கு என மூன்று மொழிகளில் வெளியாகவுள்ளது. 

இந்த படம் வரும் செப்டம்பர் 7-ஆம் தேதி உலகம் முழுவதும் உள்ள திரையரங்கில் வெளியாகும் என அறிவிக்கப்பட்டுள்ளது. அனிரூத்தின் தாறுமாறான இசையில் இப்படம் உருவாகிறது. இந்த படத்தில் நயன்தாரா மற்றும் விஜய் சேதுபதி ஆகியோர் முதன்மை கதாபாத்திரத்தில் நடித்துள்ளனர். ​ே​இவர்களுடன் தீபிகா படுகோனே மற்றும் சஞ்சத் தத் ஆகியோர் சிறப்பு தோற்றத்தில் நடித்துள்ளனர். மேலும் இந்த படத்தில்  சான்யா மல்ஹோத்ரா, ப்ரியா மணி, சுனில் குரோவர், யோகிபாபு உள்ளிட்டோர் முக்கிய கதாபாத்திரங்களில் நடித்துள்ளனர். 

தற்போது இந்த படத்தின் இறுதிக்கட்ட பணிகள் விறுவிறுப்பாக நடைபெற்று வருகிறது. இப்படத்தின் முன்னோட்ட வீடியோ நேற்று வெளியிடப்பட்டுள்ளது. அதில் அனல் பறக்கும் ஆக்‌ஷன் காட்சிகளுக்கிடையே ராணுவ அதிகாரி தோற்றத்தில் ஷாருக்கான் தோன்றுகிறார். அதேபோன்று மொட்டை தலையுடன் மற்றொரு தோற்றத்தில் இருந்தார். இந்த முன்னோட்ட வீடியோ ரசிகர்களிடையே மிகப்பெரிய வரவேற்பை பெற்றுள்ளது. இந்நிலையில் இந்த முன்னோட்ட வீடியோ புதிய சாதனை ஒன்றை படைத்துள்ளது. அதன்படி யூடியூப்பில் வெளியான இந்த முன்னோட்ட வீடியோ ஒரே நாளில் 112 மில்லியன் பார்வையாளர்களை பெற்றுள்ளது. இதை படக்குழுவினர் அதிகாரப்பூர்வமாக அறிவித்துள்ளது.