"நடிகர் நட்டியுடன் நடிக்கிறேன்"-நடிகை சாந்தினி தமிழரசனின் பேட்டி

கேம் சீரிஸ் மூலம் பரபரப்பாக  பேசப்பட்டு வரும் நடிகை சாந்தினி தமிழரசன் கூறியது: ‘தி கேம்’ சீரிஸ் பெரும் வெற்றி பெற்றிருப்பது மகிழ்ச்சியாக இருக்கிறது. 
திருமணத்துக்கு பிறகும் நான் பிசியாக நடிப்பதற்கு எனது கணவரின் ஆதரவு முக்கியமானது. வழக்கமாக திருமணம் ஆகிவிட்டால் நடிகைகள் நடிக்கக் கூடாது என்ற எழுதப்படாத விதிமுறை தமிழ் சினிமாவில் இருந்தது. அதை இப்போது பலரும் உடைத்து வருகிறார்கள். இது மகிழ்ச்சி. திருமணத்துக்கு பிறகு எனக்கு வித்தியாசமான கேரக்டர்கள் கிடைத்து வருகிறது.
நான் சினிமாவுக்கு வந்து 15 ஆண்டுகளை நிறைவு செய்ய இருக்கிறேன். இது மகிழ்ச்சியாக இருக்கிறது. அதே சமயம், நான் ‘சித்து பிளஸ் டூ’ படத்தில் நடிக்க வந்தபோது, தமிழ் பெண்கள் சினிமாவுக்கு வருவதே குறைச்சலாக இருந்தது. இப்போதும் அந்த நிலைதான் இருக்கிறது. தமிழ் பெண் என்பதால் எனக்கு பட வாய்ப்புகள் வந்தும் இருக்கிறது. தமிழ் பெண் என்பதாலேயே வராமலும் போயிருக்கிறது. மும்பை நடிகைகளை நாடிச் செல்லும் இயக்குனர்கள், தமிழ் பெண்களையும் கவனத்தில் கொள்ள வேண்டும். இப்போது விதார்த் ஜோடியாக ஒரு படம், தம்பி ராமையா மகன் உமாபதி இயக்கும் படத்தில் நட்டியுடன் நடிக்கிறேன், வெற்றி ஜோடியாக ஒரு படமும் ‘குற்றம் கடிதல் 2’விலும் ‘தி கேம்’ வெப்சீரிஸின் இரண்டாவது சீசனிலும் நடித்து வருகிறேன். இவ்வாறு சாந்தினி தமிழரசன் கூறினார்.