கோ நடிகை கார்த்திகாவுக்கு கோலாகல திருமணம்

கோ பட நடிகையும், ராதாவின் மகளுமான கார்த்திகாவுக்கு திருவனந்தபுரத்தில் கோலாகலமாக திருமணம் நடைபெற்று முடிந்தது.

1980-களில் கோலிவுட்டில் முன்னணி நடிகையாக வலம் வந்தவர் ராதா. தமிழில் ரஜினி, கமல், சிவக்குமார், சிவாஜி என பிரபல நடிகர்கள் அனைவருடனும் அவர் ஜோடி சேர்ந்து நடித்துள்ளார். தமிழ் மட்டுமன்றி தெலுங்கு, இந்தி, மலையாளம் உள்ளிட்ட பல மொழிகளிலும் அவர் நடித்துள்ளார். அவருக்கு இரண்டு மகள்கள் உள்ளனர். மூத்த மகள் கார்த்திகா, இரண்டாவது மகள் துளசி. இதில் மூத்த பெண் கார்த்திகா, கோ படத்தில் ஜீவாவுக்கு ஜோடியாக நடித்ததன் மூலம் கோலிவுட்டுக்கு அறிமுகமானார். தொடர்ந்து, பாரதிராஜா இயக்கிய படத்தில் நடித்த அவர் திடீரென சினிமாவை விட்டு விலகினார். இதைத் தொடர்ந்து அவர் தந்தையின் தொழிலில் ஆர்வம் காட்டி வந்தார். 

இதனிடையே அவருக்கு அண்மையில் நிச்சயதார்த்தம் நடைபெற்று முடிந்தது. இதை நடிகை கார்த்திகாவே அதிகாரப்பூர்வமாக அறிவித்திருந்தார். அதன்படி இன்று கேரள மாநிலம் திருவனந்தபுரத்தில் பிரமாண்டமாக திருமணம் நடைபெற்று முடிந்தது. இதில், ராதிகா, அம்பிகா, பூர்ணிமா, பாக்யராஜ் மற்றும் சிரஞ்சீவி உள்பட 80-களின் முன்னணி நட்சத்திரங்கள் கலந்து கொண்டனர்