‘விஸ்வாசம்’ சாதனையை மிஞ்சிய ‘குட் பேட் அக்லி’ வசூல்...!

தமிழகத்தில் அஜித்தின் ‘விஸ்வாசம்’ பட வசூல் சாதனையை அவரது ‘குட் பேட் அக்லி’ திரைப்படம் முறியடித்துள்ளது.

அஜித் நடிப்பில் வெளியான படம் ‘குட் பேட் அக்லி’ . மைத்ரி மூவி மேக்கர்ஸ் நிறுவனம் தயாரிப்பில் ஆதிக் ரவிச்சந்திரன் இயக்கத்தில் அஜித், சிம்ரன், த்ரிஷா, சுனில், அர்ஜுன் தாஸ், பிரசன்னா உள்ளிட்ட பலர் நடித்துள்ளனர். ஜி.வி.பிரகாஷ் இசையமைத்துள்ள இப்படத்தின் தமிழக உரிமையைக் கைப்பற்றி வெற்றி கண்டுள்ளார் ரோமியோ பிக்சர்ஸ் ராகுல்.இந்த படம் அஜித் ரசிகர்கள் மத்தியில் மாபெரும் வரவேற்பு பெற்றது. மேலும், தொடர்ச்சியாக நல்ல வசூல் செய்து வந்ததால், தமிழக வசூலில் பெரும் சாதனை படைக்கும் என கருதப்பட்டது. அதனை உறுதி செய்யும் விதமாக அனைத்து சாதனைகளையும் கடந்து, இப்போது தமிழகத்தில் அஜித் படங்களில் அதிக வசூல் செய்த படம் என்ற மாபெரும் சாதனையை நிகழ்த்தியிருக்கிறது.

 
தமிழகத்தில் அஜித் படங்களில் ‘விஸ்வாசம்’ படம் தான் வசூலில் நம்பர் 1 இடத்தில் இருந்தது. தற்போது அதன் வசூல் சாதனையை முறியடித்துள்ளது ‘குட் பேட் அக்லி’ படத்தின் வசூல். இதன் மொத்த வசூல் தமிழகத்தில் ரூ.140 கோடியை கடந்திருப்பதாக கூறப்படுகிறது. இதன் பங்குத் தொகை ரூ.65 கோடியை கடந்துவிட்டது. இந்த வசூல் வெற்றியால் அஜித் ரசிகர்கள் பெரும் உற்சாகமாகி இருக்கிறார்கள்.