'இந்தியன் 3' ரிலீஸ் குறித்து வெளியான லேட்டஸ்ட் தகவல்...!
கமல் நடித்துள்ள 'இந்தியன் 3' படத்தின் ரிலீஸ் குறித்த லேட்டஸ்ட் தகவல் வெளியாகி உள்ளது.
லைகா நிறுவனத்தின் தயாரிப்பில் ஷங்கர் இயக்கத்தில் கமல்ஹாசன் நடிப்பில் வெளியான படம் 'இந்தியன் 2'. இப்படத்திற்கு அனிருத் இசையமைத்திருந்தார். எதிர்பார்ப்பை பூர்த்தி செய்யாமல் 'இந்தியன் 2' படம் தோல்வியைத் தழுவியது. இரண்டாம் பாகம் எடுத்து வந்த போதே அதை மூன்று பாகங்களாக எடுக்கத் திட்டமிட்டதாக கூறப்பட்டது. 'இந்தியன் 3' படம் இந்த வருடத்தில் வெளியாகும் என்றும் தகவல் வந்தது.
ஆனால், 'இந்தியன் 2' தோல்வியால் 'இந்தியன் 3' குறித்து பல வதந்திகள் வெளிவந்தன. படம் வரவே வராது என்றும், அப்படியே வந்தாலும் நேரடி ஓடிடி வெளியீடு என்றும் செய்திகள் வெளிவந்தது. கடந்த வாரம் வெளியான 'எல் 2 எம்புரான்' படத்திலிருந்தும் லைகா நிறுவனம் வெளியே வந்தது. அந்தப் படத்தின் லைகாவின் பங்குகள் அனைத்தையும் கோகுலம் நிறுவனம் பெற்றதாகச் சொன்னார்கள். அதனால், லைகா நிறுவனம் மூடப்பட உள்ளதாக கோலிவுட்டில் தகவல் பரவியது.
அதற்கெல்லாம் பதில் சொல்லும் விதமாக தற்போது சில தகவல்கள் கிடைத்துள்ளது. 'இந்தியன் 3' படத்தை 'தக் லைப்' படத்திற்குப் பிறகு வெளியிட முடிவு செய்துள்ளார்களாம். அந்நிறுவனம் தயாரித்து முடித்துள்ள 'லாக்டவுன்' படத்தையும் விரைவில் வெளியிட உள்ளார்களாம். விஜய்யின் மகன் ஜேசன் சஞ்சய் இயக்கி வரும் படத்தின் படப்பிடிப்பு விறுவிறுப்பாக நடைபெற்று வருகிறது. இவற்றோடு புதிதாக இரண்டு பெரிய படங்களை தயாரிக்கவும் பேச்சு வார்த்தை நடந்து வருகிறதாக கூறப்படுகிறது. லைகா நிறுவனம் மூடப்படுவதாக வரும் தகவல்கள் அனைத்துமே பொய் என கூறப்படுகிறது.
