9 நாட்களில் கங்குவா இத்தனை கோடி வசூலா?

வெளியான 9 நாட்களில் பல்வேறு விமர்சனங்களை பெற்றுவரும் கங்குவா எத்தனை கோடி வசூல் செய்துள்ளது என்ற தகவல் வெளியாகியுள்ளது.

சிறுத்தை சிவா - சூர்யா கூட்டணியில் நீண்ட காலமாக தயாரிப்பில் இருந்த கங்குவா படம் ரசிகர்களின் எதிர்பார்ப்புகளுக்கு மத்தியில் கடந்த 14 ஆம் தேதி (14.11.2024) பிரம்மாண்டமாக வெளியானது. இப்படத்தை 350 கோடி செலவில் ஞானவேல் ராஜா தயாரித்துள்ளார். மேலும் பாலிவுட் நட்சத்திரங்களான திஷா பதானி மற்றும் பாபி தியோல் இப்படத்தின் மூலம் தமிழுக்கு அறிமுகமாகியிருக்கின்றனர். இவர்களைத் தவிர்த்து யோகி பாபு, கே.எஸ் ரவிகுமார், கருணாஸ், கோவை சரளா உள்ளிட்ட பலர் நடித்துள்ளனர். தேவி ஸ்ரீ இசையமைத்துள்ளார். இப்படம் தமிழ், தெலுங்கு, கன்னடம், மலையாளம் மற்றும் இந்தி ஆகிய மொழிகளில் 2டி மற்றும் 3டியில் வெளியான நிலையில் ரசிகர்கள் மத்தியில் கலவையான விமர்சனத்தை பெற்று வருகிறது. குறிப்பாக படம் முழுக்க அதிகமாக சத்தம் இருப்பதாக சமூக வலைத்தளங்களில் விமர்சிக்கப்படுகிறது. 

இந்நிலையில் உலகளவில் கங்குவா திரைப்படம் 9 நாட்களில் ரூ. 100 கோடிக்கும் மேல் வசூல் செய்துள்ளதாக தகவல் வெளியாகியுள்ளது. 350 கோடி பட்ஜெட்டில் தயாரான கங்குவா திரைப்படம் தயாரிப்பாளருக்கு லாபம் கொடுத்ததா ? இல்லை நஷ்டத்தை ஏற்படுத்தியதா ? என்ற கேள்வி ரசிகர்கள் மத்தியில் எழுந்துவரும் நிலையில், ரிலீசுக்கு முந்தைய வியாபாரங்களிலேயே தயாரிப்பாளர் பட்ஜெட்டில் பாதி பணத்தை பெற்றுவிட்டதாகவும் தகவல்கள் தெரிவிக்கின்றன.