விஜய் சேதுபதி நடித்துள்ள Ace படத்தின் ஃபர்ஸ்ட் சிங்கிள் அப்டேட்...!
விஜய் சேதுபதி நடித்துள்ள Ace படத்தின் ஃபர்ஸ்ட் சிங்கிள் நாளை வெளியாகும் என அறிவிக்கப்பட்டுள்ளது.
விஜய் சேதுபதி நடிப்பில் கடைசியாக வெளியான மகாராஜா திரைப்படம் மக்களிடையே பெரும் வரவேற்பை பெற்றது. இதை தொடர்ந்து விஜய் சேதுபதியின் 51 திரைப்படமாக ஏஸ் திரைப்படத்தில் நடித்துள்ளார். ஆறுமுககுமார் இயக்கியுள்ள இப்படத்தில் கன்னட நடிகையான ருக்மிணி வசந்த் கதாநாயகியாக நடித்துள்ளார். இப்படத்தின் படப்பிடிப்பு பணிகள் கடந்த ஆண்டு நிறைவடைந்தது. இதற்கு முன் ஆறுமுககுமார், விஜய் சேதுபதி மற்றும் கவுதம் கார்த்திக் இணைந்து நடித்த 'ஒரு நல்ல நாள் பாத்து சொல்றேன்’ திரைப்படத்தை இயக்கியுள்ளது குறிப்பிடத்தக்கது.
படத்தின் ஃபர்ஸ்ட் லுக் மற்றும் டைட்டில் டீசர் சில மாதங்களுக்கு முன் வெளியானது. படத்தில் யோகி பாபு, பப்லு பிரித்விராஜ், பி.எஸ் அவினாஷ், திவ்யா பிள்ளை மற்றும் பலர் நடித்துள்ளனர். இப்படத்திற்கு ஜஸ்டின் பிரபாகரன் இசையமைத்துள்ளார். இந்நிலையில் படத்தின் முதல் பாடலான உருகுது உருகுது பாடல் நாளை மாலை 5 மணிக்கு வெளியாகவுள்ளதாக படக்குழு போஸ்டர் வெளியிட்டு அறிவித்துள்ளது.
